काळ्या बाजारात विक्रीसाठी जाणारा 30 टन रेशनचा तांदूळ परतूर तहसील कार्यालयाच्या पथकाने पकडला

परतूर तालुक्यातील वाटूर फाटा येथे करण्यात आली कारवाई..

जालना :आज दिनांक 30 रविवार रोजी दुपारी दोन वाजता मिळालेल्या माहितीनुसार काळ्या बाजारात विक्रीसाठी जाणारा 30 टन रेशनचा तांदूळ परतूर तहसील कार्यालयाच्या पथकाने पकडलाय. परतूर तालुक्यातील वाटूर फाटा येथे ही कारवाई करण्यात आलीय. या प्रकरणी परतूर पोलीस ठाण्यात पाच जणांविरुद्ध गुन्हा दाखल करण्यात आलाय. परतूर येथून एका ट्रक (क्र. Mh 20 GC 2121) मधून अवैधरित्या रेशनचा तांदूळ काळ्या बाजारात विक्रीसाठी नेला जात असल्याची गुप्त माहिती परतूर तहसील कार्यालयाच्या पथकाला मिळाली होती. त्या माहितीवरून तहसील कार्यालयाच्या पथकाने सदरील ट्रकचा पाठलाग करून पिंपरखेडा वाटुर फाट्याजवळ सदरील ट्रक थांबवला. यावेळी ट्रक चालक आणि क्लिनरला ट्रक मध्ये काय घेऊन जाताय याची विचारपूस केली असता त्यांनी गाडीत तांदूळ असल्याचं सांगितलं. सदरील तांदूळ हा परतूर येथून विजू कुरेशी व युनूस शेख यांनी गाडीमध्ये भरून देऊन गोंदियाकडे घेऊन जाण्यास सांगितल्याचं ट्रक चालक आणि क्लिनरने सांगितले. यावेळी तहसील पथकाने ट्रक चालक आणि क्लिनरकडे तांदूळ खरेदीची पावती/ कागदपत्रे मागितली असता त्यांनी कागदपत्रे नसल्याचं सांगितलं. त्यामुळे परतूर तहसीलदार यांनी सदरील ट्रक आणि तांदूळ ताब्यात घेऊन या प्रकरणी पाच जणांविरुद्ध परतूर पोलीस ठाण्यात गुन्हा दाखल केलाय. ट्रॅक मालक अनिल घुले, ट्रक चालक प्रवीण घुले, ट्रक क्लिअर धनंजय पांजगे, विजू कुरेशी आणि युनूस शेख अशी गुन्हा दाखल करण्यात आलेल्या 5 जणांची नावं आहेत.