पर्यटकांना वाचवण्यासाठी दहशतवाद्यांना भिडला, बंदूक हिसकावण्याचा प्रयत्न, पण…; आदिल शाहची सुन्न करणारी कहाणी
आदिल हुसेन पर्यटकांना घोड्यावर बसवून फिरवत असत. त्याने एका दहशतवाद्याकडून रायफल हिसकावण्याचा प्रयत्न केला. बंदूक हिसकावण्याचा प्रयत्न करत असताना दहशतवाद्यांनी त्याच्यावर गोळी झाडली.
श्रीनगर : जम्मू-काश्मीरच्या पहलगाममध्ये मंगळवारी (२२ एप्रिल) दहशतवाद्यांनी पर्यटकांवर बेछूट गोळीबार केला. या हल्ल्यात २८ जणांना आपला जीव गमवावा लागला आहे. या दहशतवाद्यांनी पर्यटकांना त्यांचा धर्म विचारत गोळ्या घातल्याची माहिती प्रत्यक्षदर्शींनी दिली. तर, दहशतवाद्यांनी मुख्यकरुन पुरुषांवर गोळ्या झाडल्या. त्यांच्या कुटुंबासमोरच त्यांची गोळ्या घालून हत्या करण्यात आली. या घटनेने साऱ्या देशात संतापाची लाट उसळली आहे.
जेव्हा दहशतवाद्यांनी गोळीबार करण्यास सुरुवात केली तेव्हा तिथल्या पर्यटकांमध्ये एकच घबराटीचं वातावरण निर्माण झालं. पर्यटक घाबरून सैरावैरा पळू लागले. यादरम्यान, सैयद आदिल हुसैन शाह नावाच्या पोनी (घोड्यांचाच एक प्रकार) चालवणाऱ्याने शौर्य दाखवत दहशतवाद्यांकडून बंदूक हिसकावण्याचा प्रयत्न केला. मात्र, यादरम्यान दहशतवाद्यांनी त्यालाच गोळ्या घालत ठार केले.
आदिल हुसैन हा पर्यटकांना घोड्यावर बसवून घेऊन जात असत. त्याने एका दहशतवाद्याकडून रायफल हिसकावण्याचा प्रयत्न केला. सैयद आदिल हुसैन शाह पर्यटकांना कार पार्किंगमधून बैसरन म्हणजेच गवताच्या मैदानात घेऊन जात असत. तिथे पायीच जावं लागलं. जेव्हा सैयद आदिल हुसैन शाह बंदूक हिसकावण्याचा प्रयत्न करत होता, तेव्हा दहशतवाद्यांनी त्याच्यावर गोळी झाडली. आदिल शाहने आपल्या घोड्यावर बसवून घेऊन जात असलेल्या पर्यटकाला वाचवण्याचा प्रयत्नात आपला जीव गमावला.
मिळालेल्या माहितीनुसार, दहशतवाद्यांनी लोकांना त्यांच्या धर्माबद्दल विचारले आणि त्यांना कलमा पठण करण्यास सांगितले. यानंतर त्यांनी 28 पर्यटकांची हत्या केली. आदिल शाह या हल्ल्यात ठार झालेले एकमेव स्थानिक होते. आदिल शाह हे त्यांच्या कुटुंबातील एकमेव कमावते सदस्य होते. त्यांच्या कुटुंबात त्यांचे वृद्ध आई-वडील, पत्नी आणि मुले आहेत. याप्रकरणी कुटुंबाने शासनाकडे न्यायाची मागणी केली आहे.
मारेकऱ्यांना शिक्षा झालीच पाहिजे – वडील
आदिलचे वडील सैयद हैदर शाह यांनी एएनआयला सांगितले की, ‘माझा मुलगा काल पहलगामला कामासाठी गेला होता. दुपारी तीनच्या सुमारास आम्हाला हल्ल्याची माहिती मिळाली. आम्ही त्याला फोन केला, पण त्याचा फोन बंद होता. त्यानंतर दुपारी 4.40 वाजता त्याचा फोन चालू झाला, मात्र कोणीही उत्तर दिले नाही. आम्ही लगेच पोलीस ठाण्यात गेलो. त्यानंतर आम्हाला समजले की या हल्ल्यात त्याला गोळी लागली होती, याला जो कोणी जबाबदार असेल त्याला शिक्षा झाली पाहिजे.
या घटनेमुळे संपूर्ण परिसरात शोककळा पसरली आहे. आदिल शाह यांनी स्वतःच्या जिवाची पर्वा न करता इतरांना वाचवण्याचा प्रयत्न केल्याचे लोक म्हणतात.
